 |  |  |
| Jovis die 28 mensis Septembris 2023 | ||
ACROAMATA & ALIA BLOGA LATINA
Hic praebentur acroamata (vulgo: podcasts) et bloga varia quae in rete inveniri possunt. Certe opiniones hic expressae externae sunt Ephemeridi.
FRANCISCUS LEPORE
Nuntii Latini
De novo libro Amadei La Mattina
27 Sep 2023, 03h00
Opus hoc, quod vulgo "Metamorfosi Giorgia" inscribitur, domus editoriae “Linkiesta” typis excusum est
Ex perendino die novus Amadei La Mattina liber, qui iam nunc in interrete quindecim euronummorum pretio emi potest, apud omnes bibliopolas prostabit. Cui operi, quod ducentis paginis constat, auctor, qui magni nominis diurnarius est, titulum “Georgiae Metamorphoses”, Italice Metamorfosi Georgia, nimirum indidit.
Georgius Napolitano nobis ereptus est
23 Sep 2023, 03h00
Qui bis summus Italicae Reipublicae rector fuit, mortem obiit undecentesimo aetatis anno
Die hesterno in Urbis nosocomio, quod in colle Ianiculo surgit, Georgius Neapolitano, duodecentum annos natus, animam exhalavit. Postquam novem per lustra Communistarum factionem rebus gestis illustraverat, iterum ac saepius legati popularis et a negotiis publicis administri officio iterum ac saepius functus erat, Legumlatorum coetui semel praefuerat, novem annos supremi Civitatis Italicae moderatoris munus sustinuit atque rei publicae gubernacula tam firmiter imperioseque tenuit, ut “Georgius Rex” cognominaretur.
Ut pellicula, cui titulus “Ego centurio”, Praemio Ansgariano honestetur, spes Italis magna est
21 Sep 2023, 03h00
Nunc sententia exspectanda est, quae die XXI mensis Decembris sodales Academiae Silvacrifoliensis de candidatis primum ferent
Heri nuntiatum est speciale arbitrorum collegium, quod nationis sodalitas industriis cinematographicis fovendis, quam compendiariis litteris ANICA vocant, sane instituit ut Italicum horama ad accipiendam palmam Ansgarianam pro optima pellicula internationali candidatum designaret, ex duodecim taeniam visificam, cui titulus “Ego centurio”, vulgari lingua Io Capitano, a Matthaeo Garrone, pelliculari dispositore, inditus est, iure meritoque delegisse. Nunc exspectanda vero est Silvacrifoliensium academicorum sententia, quae primum de candidatis die uno et vicesimo mensis Decembris hoc anno, deinde de quinque selectis pelliculis vel hominibus die tertio et vicesimo mensis Ianuarii proximo anno bis millesimo vicesimo quarto feretur. Atque interea Itali sperant opus illud, quod Matthaeus Garrone affabre confecit, Praemio Ansgariano donari posse.
Ioannes Vattimo veram ad vitam evolavit
20 Sep 2023, 03h00
Qui maximus inter recentiores philosophos Italicos fuit, extremum traxit spiritum, cum annos septem et octoginta, menses octo, dies ducentos sexaginta duos vixisset
Heri non multo postquam sol aureus occiderat et luna argentea in caelo sereno fulgere coeperat, Ioannes Vattimo, annum agens duodenonagesimum, in Ripularum valetudinario animam placide exhalavit. Quinquaginta fere annos philosophiam in Taurinensi studiorum Universitate tradidit, ubi apud Aloisium Pareyson, qui eum supra omnes discipulos suos diligebat, aestheticam disciplinam didicerat posteaque doctoris gradum dignitatemque consecutus erat. Qui maximus inter recentiores philosophos Italicos fuit, doctissimis scriptis et philosophandi genere, quod is quidem instituit ac cogitationem debilem appellavit, maxume inclaruit. Usque ad ultimum vitae spiritum professus est se homosexualem esse et catholicum. Quo defuncto, tanti hominis mortem lugemus eique pacem imploramus sempiternamque beatitudinem. Sit terra levissima Ioanni.
Novus liber, qui de beato Iosepho Puglisi agit, in lucem proditus est
19 Sep 2023, 03h00
Quod opus, valde quidem grave utileque, Augustus Cavadi et Cosmas Scordato perscripserunt
Die Veneris tricesimus expletus est annus, ex quo Iosephus Puglisi – omnibus deminutivo nomine Pino notus –, inclutus Panormitanae archidioecesis presbyter indefatigatusque curio paroeciae Sancti Caietani ac Beatae Mariae Virginis a Divino Amore, quae in urbis Siciliae principis vico vulgo Brancaccio sane est, alacer Evangelii praeco strenuusque iustitiae et libertatis defensor, cum a nequissimis hominibus ad facinora patranda consociatis, seu mafianis, in fidei odium interfectus esset, fulgentem martyrii palmam obtinuit. Qua data occasione, Augustus Cavadi, philosophus ac scriptor opusculi altioris doctrinae, et Cosmas Scordato, sacerdos insignis ac theologus, qui, mafiosis sodaliciis fortiter repugnando, invicti martyris vestigia calcat, librum, qui “Pater Iosephus Puglisi: leo desperatione rugiens”, Italice Padre Pino Puglisi. Un leone che ruggisce di disperazione, inscribitur, diligenter exaraverunt atque nuperrime domus editoriae, quam vulgari lingua Il Pozzo di Giacobbe vocant, typis excudendum curaverunt.
____________________________________
|
|
|
|
