 |  |  |
| Jovis die 28 mensis Septembris 2023 | ||
ACROAMATA & ALIA BLOGA LATINA
Hic praebentur acroamata (vulgo: podcasts) et bloga varia quae in rete inveniri possunt. Certe opiniones hic expressae externae sunt Ephemeridi.
Scriptorium Academicum Latinum
De mammis et papillis muliebribus
18 Aug 2023, 15h41
Cerevisia "Mamma" inscripta. Nuper ex terra Belgica redii salva incolumisque una cum familia (tredecim cognatis) post varios dies peregrinans per Bruxellam et Brugas et Antuerpiam et Lovainam. Iter iucundissimum fuit, de quo hodie tantum pauca dicam, maxime de quadam cerevisia Belgica, quam illic gustavi cum filia aliisque familiaribus.Mirati quidem sumus pro cerevisiae nomine et pittacio et imagine, qua lagoena et pocula ornabatur, scilicet mammis et papillis, tamquam si foret aliquid cottidianum et usitatum. Aliquot dies post quam in patriam Hispanicam redii, apud nos controversia quaedam orta est, quia quaedam cantatrix clarissima, dum in concentu canebat, pro mulierum dignitate coram spectatoribus contionata est et defendit libertatem palam monstrandi mammas et papillas, sicut viris haec potestas est.Multae voces contra hanc feminam sublatae sunt ab eis qui hoc carpebant et plurima in eam legi et audivi insulsa, quae hic scribere nunc nolo. Mammas muliebres ultro monstrare eisdem locis quam viri videbatur ius hodie iam acceptum, sed adhuc multi sunt qui eas palam videre timent aut spernunt, procul dubio propter res Venerias in cerebro hominum radicitus insitas.De mammis Plinius Maior Aristotelem sequens dixit haec luce solis clara (11, 232):Mammas homo solus e maribus habet, cetera animalia mammarum notas tantum. sed ne feminae quidem in pectore nisi quae possunt partus suos attollere. ova gignentium nulli; nec lact nisi animal parienti.Mammae quidem sunt virorum et mulierum, lac autem continentes mammae earum hominum quae animalia pariunt.Forte fortuna etiam multi viri et feminae fuerunt qui hunc gestum plauserunt, inter quae ipsa numerata sum. Testimonium est haec commentatio, quam vobiscum, lectrices fideles, lectores candidi, compartiri volo.
Imago sumpta hinc.
Eugeni Delacroix "Libertas populum ducens" (1830)
Aloysiae Roldanae Virgo lactis (1689-1706)
Venus Melia.
'Laudum Ucrainae' altera editio
16 Aug 2023, 15h20
Russiam nactus es, imperator barbarissime,hanc orna atque cole humanitatem!His verbis incipit praefatio a me conscripta, qua poetriae clarissimae Annae Elissae Radke ann 1940 natae librum c.t. Laudes Ucrainae, lectoribus omnium gentium commendo. Altera editio enim est, hoc anno in lucem prolata eaque aucta, cuius prior editio, de qua olim mentionem feci, anno 2022 typis commissa est.Novissima haec editio quidem sexaginta et quinque carmina nunc continet, quae e sermone Latino in quinque linguas versa sunt, scilicet Germanice ab ipsa poetriae Anna Elissa Radke, Francogallice a poeta belga Alaeno van Dievoet, Polonice a Ioanna Rostropowicz, Ucrainice a Ludmylla Shevchenko atque Hispanice a me ipsa una cum quattuor discipulis meis qui quinque carmina transtulerunt.Erasmus ille Roterodamus quidem olim Adagio quod est 'Spartam nactus es, hanc orna!' ante oculos hominum monstrabat errores regum principumque eorum qui neglecta, quae contigit, ditione foris agunt, alienis inhiantes imperiis, suos in summum adducunt discrimen, suos exhauriunt funditus, seque pariter et universam fortunam aleae belli subiiciunt, ut unum aut alterum oppidulum adiiciant suis finibus.Sperabamus fore interpretes huius libri omnes ut, cum hic liber, quem anno 2022 nuper delapso in sermones vernaculos vertimus, in lucem proferretur, bellum Russico-Ucrainense in finem iam pervenisset, victoria ab oppugnatis nacta, sed pro dolor! bellum hoc iniustum et iniquum et crudele adhuc manet. Sed praeter hanc tristem calamitatem propositum et inceptum pulcherrimum mihi fuit, nam occasio mihi data est optima habendi commercium epistulare iucundum cum humanissima femina atque egregia poetria Latina viva.Ecce vobis, lectrices fideles, lectores candidi, Annae Elissae Radke carmen utrumque, alterum, quod mihi maxime placuit, alterum, quo clarissima poetria gratias summas nobis interpretibus egit.55. De victoria desiderata"Audivere dei" dixit Horatius,vos pusillanimes, audiit et precesUcrainae innumeras: Noster adest Deus:palmam militibus dabit,qui lassi recubant cumque sodalibuserectis tamen et auribus hauriuntcantum dulcisonum, quod fidicen canitfirmans carmine spiritum.At quid barbaries hostium agit? Rapit,occidit, iugulat, dira facit stupra,pontes atque domus destruit urbium,ut mos est cacodaemonum.Virtus unanimis spesque sodaliumvincet cumque fide non precibus sine,multis cum lacrimis, pauperie et fame:Te, Ucrainam, cecini auream!Gratiarum actioSandrae Ramos, Alaeno van Dievoet, Ioannae Rostropowicz et Ludmylae Shevchenko dedicataMercuriales, currite, nuntii,transferte vestris carmina gentibus,incendite ignem humanitatis,Musa modo mea quem excitavit!Quassemus una flammiferas faces,una fugemus barbariem horridam,et caelitus tollamus istamlaudibus assiduis Ucrainam!P. Scr.: Versionem Hispanicam, quam abhinc aliquot mensibus scripsi, hic habetis. Hanc commendationem nunc exaro vobis, quia iam eam fecisse putabam immemor. O caput insulsum!
De prima symbola mea in 'Ephemeride' in memoriam Francisci Ibáñez, egregii delineatoris Hispani creatorisque 'Mortadeli et Philemonis'
21 Jul 2023, 15h28
Nova vobis nuntio, candidissimi lectores, lectrices fideles, quod prima symbola mea hodie in lucem edita est in Ephemeride, actis hebdomadalibus Latine scriptis anno 2004 Varsoviae natis, per rete divulgatis, ad omnia scitu digna spectantibus. Maximo honori mihi tribuit Albinus Flaccus, quippe qui me invitaverit ut ipsa quaedam "Chronica" meo nomine scriberem. Tempore subsicivo pro dolor careo ad scribendum negotiis academicis sepulta, sed aliquid exarare conabor, nam Latine legendo et scribendo indeque discendo fruor. Ecce vobis prima Chronica, quae etiam hoc in scriptorio insulso condam:***
Imago hinc desumpta Belgis exstant Titinus et Milulus, quorum clarissima facinora anno 1930 a Georgio Hergé excogitata et picta sunt atque etiam hactenus in duobus libris a Caelesti Eichenseer in Latinum sermonem conversa et edita sunt: De Insula Nigra (1987) et De Sigaris pharaonis (1990).Francogalli Asterigem et Obeligem habent, quorum res gestae, primum anno 1959 a Renato Goscinny scriptae et ab Alberto Uderzo delineatae, in plurimas linguas atque etiam in Latinam versae sunt. Etenim primum exemplar Latinum, cui titulus Asterix Gallus fuit, anno 1973 a Carolo Rubricastellano in lucem editum est. Inde fere omnes Asterigis et Obeligis libelli plusquam triginta Latine legere possumus.Apud nos Hispanos autem anno 1958 duo personae delineatae in libellis pictographicis apparuerunt a Francisco Ibáñez creatae, quae multorum iuvenum et aetate provectiorum horas otiosas gratanter et facete compleverunt atque adhuc complent. Numquam tamen pro dolor! eorum facinora in sermonem Latinum versa sunt. Qua de causa has binas creaturas maximas et optime depictas nunc describens obsequium praebere volo huic egregio auctori et delineatori Hispano, quippe qui die quinto et decimo mensis Iulii hoc anno de vita decesserit octoginta et septem annos natus.Mortadelus et Philemon sunt duo investigatores privati et stolidi et lenti, qui autem risum semper movent, quia in errores multos incidunt, dum crimina sceleraque resolvunt. Initio ei visi sunt tanquam iocosa imitiatio illius clarissimi investigatoris Britanni Sherlock Holmes nuncupati eiusque socii Doctoris Watson, sed illi Hispani homunculi picti mox mutaverunt et speculatores evaserunt, qui opus faciebant suum sub imperio cuiusdam Sedis Centralis Exploratoriae, quae litteris compendiatis T.I.A. dicebatur (quod sibi vult “Technici Investigationis Aeroterreae”, sed etiam amitam, Hispanice “tía”, significat), iocosam imitationem illius Sedis Americanae C.I.A. nuncupatae.Philemon vir gravis est, qui tantummodo duobus pilis super caput praeditus bracis rubris, tunica alba et focali nigro in papilionis formam redacto semper induit atque saepe iratus apparet. Mortadelus gracilis et calvus et magno naso est, vitra ocularia sive perspicilla gerit, colore nigro semper induit et stultior et ineptior videtur quam socius Philemon, quem hac de causa “ducem” appellat, sed Mortadelo maxima facultas est permutandi vestem indeque agendi personato ad arbitrium. Aliae personae pictae eos comitantur, videlicet Archipraefectus (vulgo “Superintendente”), doctor Bacterius, qui multas res excogitat et invenit, Ophelia secretaria… quae personae omnes in memoriam revocant fabulam illam commenticiam, in qua speculator Iacobus Bond, anno 1953 a scriptore Britanno Ioanne Fleming creatus, primas partes agebat.Sunt qui dicant, si tibi placeat Mortadelus, tibi gratum esse Asterigem, sed minime Titinum. Nos Hispani quidem Asterigem malemus, ergo etiam Mortadelum et Philemonem, maxime Mortadelum, quia facetior est isque rex simulationis vestes et figuras alienas induens. Utinam eorum facetisimae historiolae et ridicula facinora in sermonem Latinum unquam versa sint, sicut illa Titini aut Asterigis!Valeant interim hae lineolae scriptae ad celebrandam memoriam aeternam Francisci Ibáñez, horum duorum homunculorum speculatorum et aliarum personarum depictarum magnifici delineatoris atque artificis, qui iam factus est mythicus, utpote qui ipse in Hispania plures libellos pictographicos vendiderit et plurimas historiolas pictas in lucem iterum iterumque ediderit.
Utrum mavis?
14 Apr 2023, 17h31
Popularis versio.
Epigramma hodiernum salem Martialis redolens ab Alexandra insulse compositum:Utrum mavis? Culum an mammas? Elige, Paula!Malo immo cerebrum: vix cadit irruitum!Martialis Epigramma II 21:Basia das aliis, aliis das, Postume, dextram.Dicis 'Utrum mavis? elige.' Malo manum.
Inde a scientia usque ad coexistentiam
26 Mar 2023, 14h10
Mutatis muntandis, hoc adhibete, lectores candidi, lectrices fideles, ad scientiam humanitatis.
____________________________________
|
|
|
|
