Mercurii die 13 mensis Maii 2026

ACROAMATA & ALIA BLOGA LATINA

Hic praebentur acroamata (vulgo: podcasts) et bloga varia quae in rete inveniri possunt. Certe opiniones hic expressae externae sunt Ephemeridi.

Scriptorium Academicum Latinum



De humanitate

 09 Mar 2026, 13h13
Homines, non autem humanitatem video.

  • PLIN. nat. 3, 39: nec ignoro ingrati ac segnis animi existimari posse merito, si obiter atque in transcursu ad hunc modum dicatur terra omnium terrarum alumna eadem et parens, numine deum electa quae ... humanitatem homini daret...
  • SEN. dial 5, : Interim, dum trahimus, dum inter homines sumus, colamus humanitatem...
  • GELL. 13,17, pr. 1: Qui uerba Latina fecerunt quique his probe usi sunt, 'humanitatem' non id esse uoluerunt, quod uolgus existimat quodque a Graecis φιλανθρωπία dicitur et significat dexteritatem quandam beniuolentiamque erga omnis homines promiscam, sed 'humanitatem' appellauerunt id propemodum, quod Graeci παιδείαν uocant, nos eruditionem institutionemque in bonas artis dicimus. Quas qui sinceriter cupiunt adpetuntque, hi sunt uel maxime humanissimi. Huius enim scientiae cura et disciplina ex uniuersis animantibus uni homini datast idcircoque 'humanitas' appellata est.


Vis recedendi

 01 Mar 2026, 15h33

     Recedere aliquando sibi vult fortiter agere, non fugire nec arma tradere. Immo recedere saepe significat concordiam quam discordiam malle, tranquillitatem quam perturbationem, optimam valetudinem animorum quam consuetudinem laborum. Recedere, cum opus est, salutem dare atque a periculo vindicare nobis potest. Nam eis qui sic agunt, quamvis modo tacito, vis est maxima ut vita in melius mutetur ac pax merito reddetur.

"... rogat ut quantum potest fugiat et properet, antequam aliqua vis maior interveniat et auferat libertatem recedendi" (Seneca, Epist. ad Luc. III 22, 5).


"Lyra Amphionis" (2025), Anna Elissa Radke auctrice

 18 Feb 2026, 21h00
Hodie natalem diem celebro meum atque ex terra Germanica munusculum magnum et pulcherrimum accipio, scilicet  aliud volumen poeticum pertinens ad seriem librorum eorum quos inde ab anno 2022 de bello Ucrainico poetria humanissima Anna Elissa Radke componit propter oppugnationem Russicam. Est volumen sextum, quod sibi vult hoc bellum pro dolor! nondum in finem pervenisse. Unde nunc inscribitur Lyra Amphionis (Львів ФОП Bacилик [Lviv (Leópolis, Ucrania), 2025, 48 pp. ISBN: 978-617-8523-09-1), quia poetria queritur tantas in Ucrainam ruinas impendere ut utinam alter Amphion firma moenia lyrā suā prius extruxisset. Qua de causa ex imo corde exoptat ut alter Amphion adeat atque citharā Latinā altiora solidioraque moenia extollet.    
       Libri praefationes Anglice et Ucrainice a consocia Ludmilla (Lyudmyla) Shevchenko, Universitatis Ucrainicae profestrice, conscriptae sunt sub titulo "Ars licet imbellis, sed tamen arma reget" (A. E. Radke).


    Opusculum hoc novissimum continet dedicationem liberis Ludmillae, pueri scilicet Gregorio Balashov eiusque sorori Catharinae Shevchenko, ut memores sint, si legent quondam, vatis et eius obstinatae pugnae pro eorum patria Ucraina. Post "Prooemium libri sexti" unum et quadraginta carmina de argumentis diversis composita sunt, omnia autem ad hoc bellum nefarium relata; deinde "Horatius armatus" duodecim carminibus advenit; mox decem "Epistulas ad heroa quendam (Partem II)"; et postremo undecim carmina "Gregorio et Catharinae" dedicata. In summa Anna Elissa nobis donavit LXXV carmina suavissima "lyrā Amphionis" comitata. 

    Ecce vobis, lectrices et lectores fideles, ut gustetis, carmen aditiale:
 

          PROOEMIUM LIBRI SEXTI

       Deletam ante domum stabam, stabam ante ruinas
          irata et lacrimans: Cur, Domine, haec pateris?
       O utinam nobis Amphion alter adesset,
           qui prius exstruxit moenia firma lyra!
       Alter et Amphion aderit citharaque latina
           altius extollet moenia perpetua.


   Inter omnia carmina hos versos selegi ad partem c.t. "Horatius armatus" pertinentes, utpote qui Flaccum redolentes de libertate populorum in Europae limitibus habitantium aguntur, strophis Sapphicis concinnatis, quibus Anna Elissa doctissima patriam meam Gaditanam et illam Ludmillae Ucrainicae sapienter coniunxerit:


***

     Interpretationem Hispanice addidi meam quoque usa numeris Sapphicis [i.e. syllabae 11+11+11+ 5] in calce paginae c.t. Sal Musarum.


De Sanctae Catalinae arce Gaditana eiusque inscriptione Latina (1599)

 19 Oct 2025, 14h52
Aditus in Sanctae Catalinae arcem Gaditanam (Imago a me ope lucis expressa)

  Exeunte mense Septembri in urbe Gaditana celebrata est "Septimana in memoriam Gadium Romanarum", quae pulcherrima expositione "Inde a Gadibus usque ad Romam" inscripta initium fecit et finivit magno cum spectaculo c.t. "Foedus Romanorum". Inter multa quae acta sunt, in arce Gaditana Sanctae Catalinae nobis licuit spectare quomodo antiqui Gaditani funera atque exequias celebraverint et sepultura constituerint.  

   Inter ea omnia que animum meum excitaverunt, quandam inscriptionem Latinam inspexi, quae in fronte illius arcis Gaditanae erat. Mihi confitendum est (non sine quadam rubore) numquam illam novisse. Cum difficilia lectu essent verba in illa tabula petrea incisa propter multas litteras compendiatas, imaginem ope lucis expressi, ut postea domi meae melius perlegere possem atque notitias de ea quaererem.

      Multum equidem quaesivi in rete omnium gentium, nihil autem inveni nisi quandam interpretationem fabulosam, quae nihil ad rem pertinebat. Quamobrem mirata sum quod inde a saeculo decimo et septimo nemo hanc inscriptionem interpretatus esset atque tempore hodierno nullius interesse videatur.  

    Inscriptio Latina anno 1599 incisa est Philippo III regnante atque ad novam arcem Gaditanam refertur quam eius pater Philippus II Hispaniarum et Indiarum rex anno 1598 erigi iussit, postquam sinus Gaditanus atque oppidum Gadium ab Anglis Batavisque anno 1596 oppugnatum est.

     Adhuc inscriptionem rimor et pesrcrutor, quia dubium unum mihi est de litteris compendiatis quae sunt HER. Nam arx sine dubio erecta est sub ductu Christophori Rojas, qui autem architecti Iohannis Herrera anno 1597 mortui discipulus fuit. Nihilominus ecce vobis ea quae usque adhuc interpretata sum atque in nonnullo commentario periodico fusius perficiam ac divulgabo:

Imago a me ope lucis expressa.

© Ecce mea interpretatio litterarum Latinarum compendiatarum:

A[d] P[erpetuam] R[ei] M[emoriam]  

PHI[li]P[pi] II HISP[aniarum] ET IND[iarum] R[egis] POT[estate]  N[ova] ARX ET PROPVG[naculum]  
ISTVD SVB D[uctu] AC HER[rerae?] PATROC[inio] A FVND[amentis] ERIGI COEPTVM  
III ID[us] APRIL[es] ANNO SALVTIS M.D.XC.VIII.  
SVB PHILIP[po] III, PATERNA IN REB[us] BEL[licis]  SOLLICITVD[ine], NOMIN[i] IMMOR[tali],  
MOX AN[no] SVBSEQVEN[ti] FVIT DEMVM ABSOLVTVM.  

M.     D.     XC.      IX.

***

© Ecce vobis mea interpretatio Hispanica:

Castillo de Santa Catalina de Cádiz:

Inscripción latina en la puerta de acceso 

Para su perpetua memoria:

Por la autoridad de Felipe II, rey de las Españas y de las Indias,
esta nueva fortaleza y baluarte,
bajo la dirección y patrocinio de Her[rera?],
comenzó a levantarse desde los cimientos
el 11 de abril del año de gracia de 1598.
Bajo Felipe III, por la paterna solicitud en los asuntos bélicos y
para la inmortalidad de su nombre,
se concluyó finalmente al año siguiente.

1599

***

Aestatis extremum

 29 Aug 2025, 14h21
Hesterna tempestate litus vacuum erat natatorum, quibus pugnandum est in adversas aquas. Aestatis extremum est.

      


 Natator nullus 
   super fluctus marinos: 
         Horror vacui. 


____________________________________