ACROAMATA & ALIA BLOGA LATINA

Hic praebentur acroamata (vulgo: podcasts) et bloga varia quae in rete inveniri possunt. Certe opiniones hic expressae externae sunt Ephemeridi.

---

DEUS EX CRAPULA (novus)

---

de sono

09 May 2026, 12h28
Silentio abhorreo. Noctu non possum sine sono mechanico dormire, diu sonum humanum requiro ut procellam sententiarum repellant. Domi haec simplicissima : vigil musicam vel orationem (podcastum &c.) vel pelliculam (quem non specto) in ordinatro ago, obdormiens machinam iuxta cubili habeo quae aërem purificat et tranquille sicut ventus sonat.

Malo igitur in thermopolio scribere linguisque studere. Sonitu turbae, nonnumquam cum musica semi-auscultata, strepit omnis murmure campus locus (pace Verg. A. 6.709). Sonus leniter undat, ut mens in opus tota vortatur.

Sed et haec tranquillitas ex humanitate aliorum dependet. Sunt qui in telphonum clament, seu tiktok sonore spectent, seu sinant infantes suos per locum saevire, seu se gerantur odiose in genere, sicut (mea in vicinia quasi-gentrificata) isti nummati ξενοφοβούμενοι semper de peregrinis querentes.

Solum in bibliotheca silentium requiro : δεῖ γὰρ ἐν ἁγνῷ εὐφημεῖν. Pallium taciturnum sentio quod thecas ornat et onerat, cuius gravitas me vero delectat. Tametsi silentium omnino non reget. Voces bibliothecariorum repressae, crepitus sedilium, susurrus paginarum evolutionis, styli scabentes surde sonantur cum inanitas sonitus vorat.

In urbe, et multa nocte, silentium perrarum. Lampades horas nocturnas (eheu !) semper inluminant, ita volucres numquam canere desinunt. Neque curri cunctantur praetervehi. Olim mense Decembri cum familia Mellis demorati sumus, et noctu tranquillitas ruris somnium furata'st. Tantopere silentium in auribus resonabant !

---

Medicus nuper mihi dixit me tinnitum pati. Soni cottidiani eum celant, quibus semotis stridorem acutum aperte discerno. Usque adhuc illum credidi sonum telluris volventis, unum e mysteriis naturae sicut istae atrae maculae qui omni in campo coloris, et albidinis praecipue, saltent. Nolim causam earum ex opthamologista sciscitari.

comments

---

16 Apr 2026, 10h39
Mysteria conscientiae iterum me inritant. Olim haec quaestiones somnium furabantur, ad libros magis magisque reconditos pulabant, donec sapientiam despondi. Ad poësin igitur animadvorti. Inibi latitat omnium oraculorum veritas. Et metrum, si in cubile carmina lego, est optissimum medicamen somniferum.

Philosophiam ipsam non omnino seposui, sed ardor tractatus perlegendi defervit, evanuit paene scribendi. Fragmina in pugillaribus interdum exscribebam statimque dereliqui. Denuo mentem obrodit desiderium sciendi, hoc phasma intellectus fugiens quod frustra persequabar. Fortasse oportet ea fragmina denique poliam, ut notiones in corde agitem (et ephemeridem refoveam).

comments

---

07 Apr 2026, 15h37
Sex enim menses non possum calamum suscipere quin francogallice scribam. Floret igitur ephemeris papyri nova, sed et haec electronica alget. Somnium est ea scripta uspiam in rete edere, attamen tanta dactylographia horresco, sic dubito. Sodalitates immanes situs in rete hodierno maiores possidunt, quos saepius stultissime mutant, et pecuniam usuariis semper anteponunt (dein lucro suo utitur ut mundum abuterentur). Situs parvi aut non manent aut non faciliter inveniuntur, ita communione carent ; sic progreditur inmerdificatio mundi. Quid faciam nescio, sed has cogitationes in mente peragebam... frustra.

Praeter hoc quid faciebam ? Studia feliciter non seposui. Si diem Saturni et/seu Solis in thermopolio cum libris grammatices non degam, pro certo delirem. Inscriptiones semper antiquiores, regis Enannatum qui Lagaš MCC ante Troiam captam regnavit et filii eius, Enmetena, francogallice reddebam.

Oxoniam iimus ut amicos inviseremus, Chinteneham ut cum sororibus Mellis spectaculum drag spectaremus. Speluncas apud Chislehurst invisimus, labyrinthum sub collibus cretae cavatum a celtis neolithicis sive a druidis sive a romanis sive a saxonibus sive, verisimiliter, Medio Aevo posteriori. DJes gothici noctem in subsolio aedium iuxta speluncis (sub museo, tabernula, et popina) instituerunt, quae circuitu speluncarum incipit. Dux valde gavisus est turbam gothicorum labyrinthum explorare, et luce lanternarum mythos narratiunculasque cruentas nobis exponuit. Adeo enim gaudebat ut circuitus duas horas duraret et sero ad locum saltatorium reveniremus. Multi tum saltabant, qui non hac nocte in speluncis erraverunt. Cerevisia acquisita in eorum medio properavimus. Comisatores ibi et iuvenes et veteres intermixti : sex in decenniis nati erant. Turba chintenhamensis multo erat iunior.

Arcoasin de libellis Penny Dreadfuls suam apud bibliothecam fecit Mel. Historiam breviter exposuit, dein singulatim exemplaria bibliotheca introduxit, postquam auditores hortata'st ut intuerentur et evolverent.

Cum Mel in conventiculo ab Vrbe afuisset, solus domum opulentam Kenwood House invisi. Architecturam et picturas praecipue volueram intueri, sed custos singulis in cameris quam garruli contemplationi placidae nocuerunt. Mox ad thermopolium fui, quo in pugillaribus scribebam donec jazz in stereophono cani desinit.

Solus quoque ad museum Tate et ad National Gallery ivi ut picturas saeculorum XVIque XVIIque contemplarer. Consilium habui, quod ad coeptum mihi novum attinet, sed de hoc alias.

comments

---

29 Jan 2026, 16h22
Ἡ ἐμὴ φίλη ἐν τάχει φεύξει · τὸ γὰρ ἐχθρόξενον κοινὸν οὐκ ἀποτενεῖ τὴν ἄδειαν. ποῦ ἡ Δίκη ; ποῦ ἡ ξενία ; διὰ τί οἱ πολιτικοὶ ὑπέρχονται τοὺς μιαρούς τε καὶ τοὺς ἀπαιδεύτους ;

comments

---

28 Jan 2026, 19h10
Vrbis sensum amittebam, etiamque frustra capto. μονόμετρος ὁ βίος, quamvis multas per linguas eum exprimam. Novitatem etsi desidero omnino respuebam. Malo diem de die in eodem thermopolio delitescere, pro aetate aënea mundi recentis oblivisci. Libros lego quos nemo e meis cognoscunt neque cognoscere vellent, latebrose in libellis inconsultos locos exscribo quos edere non audeam, scripta antiqua aegre animadverto et lacunosa et obscura, intellectum inter rimas petens. Olim noctu in tabernis amicos de eis sermocinabar, nunc autem auditoribus tanta cum indulgentia careo. Nolo igitur usquam abnoctare. Melius tacere quam importune acroases dare, ita facilius in atrium abscedere. At gustatus Vrbis dilabitur. Alienae fiunt viae, quo quondam commisarer. Memoriam noctium longinquarum umbrae devorent, tempus vestigia dierum conterit. Si in centro vagor, iter nec novum nec adsuetum. Tabulae est similis, in quo signa, quae omnia enodere possint, desunt. Peregrinus iterum factus sum, peregrinior quam cum olim fuissem advena. Vrbs denuo comperienda, saltem oportet in thermopolio alia in vicinia sedere.

comments

---

---

____________________________________