MUSEUM IMAGINARIUM

De rebus visis et mente fictis chronicon Ansgarii Osloensis

De naturae theatro 

Henricus Desmazières, eximius chalcographus Francogallicus (1948-), atque investigator rerum occultarum diligens admodumque sedulus, mundos imaginarios ac locos solitarios atque ab omni turba vociferantium remotissimos, duplice ratione, graphio exaravit doctissimo. Nam non tantum locos omnino mente fictos, verum etiam aedificia vera mortalibusque plane cognita, summa cum arte ingenioque eximio curiose atque insigniter effinxit, utpote qui tum bibliothecam Babilonicam Borgesianam, imaginibus aere incisis mirificis, illustraverit, tum Bibliothecam Nationalem Parisiensem, chalchographematibus exquisitis delirisque, minutatim depinxerit. Pariter igitur mundos animo simulatos, et locos, ubi cumprimis imaginationi artibusque reconditis vacant operamque abcondite ac furtim dant homunciones solitarii ac rerum arcanarum curiosi. Itaque, his in chalcographiis, bibliothechae nobiles illustresque, voluminibus instructae doctissimis, augusta planetaria, ubi licet hominibus ad meditationem inclinabilibus orbem siginiferum altius inspicere, pinacothecae egregiae, quibus continentur opera summo artificio confecta, studiola pergolaeque artificum, specula astronomica vel obervatoria, denique terrae longinquae omnibusque numeris animo fictae, imprimis abundant. In chalcographia, cui titulus Wunderkammer II, omnnes hos locos, simul imaginarios et veros, Henricus, velut praestigiarum artifex callidissimus, mirandum in modum in eadem imagine, vel potius orbe gemino, stilo graphice subtiliterque inciso, ubi permulta iuxta realia et mirbilia spectantur, arcanius coniunxit, ut liceret hominibus otiosis artiumque cultoribus elegantium, eodem tempore terrena atque sideralia demirari. Videmus enim, oculis errabundis inque cernendo non semper accerrimis, nam versamur in quodam naturae theatro, in quo copia rerum formarumque mentem conturbat, perplurimas res dispares dissimilesque in spatio simul exigio et vastissimo. Chalcograpus inter alia speciatim accuratiusque notavit animalia praeparata, coralia, urnas varii generis, instrumenta magica et astronomica, fossilia, conchylia, pisces exsiccatas, crocodilos, phantomata anatomica, necnon cadaver medicatum vel potius mumiam! Quam mumiam simia quaedam perelegans, more humanorum utque in ludis scaenicis, delicate persona vel oris tegumine faciem occultans, ludabundus ac procax inspicit! Ex multis speciminibus animalium universitatis, quae omnibus angulis huius imaginis pullulant, praesertim nobis stuporem benevolentiamque commovent rhinoceros meditabundus, non nullae aves insolitae magnitudinis vespertilioque monstruosus, ut revera quodam in mundo Pliniano, non minus fabuloso quam verisimili atque sensibus subiecto, ambulare videamur. In centro imaginis, velut in loco columnae, ut hoc templum sustineat mirificum, videmus cacodaemonem obscurum ambiguumque, qui oculis obtectis larva histrionali, procul dubio quo longius atque acutius prospiciat, ornatissimam in lancem nobis praebet coralia, conchas aliaque omnino incognita. Forsitan sit deus tutelaris qui rerum mirabilium cornucopiam servat atque custodiat? Quid amplius, huc illuc errantes conspiciuntur homunculi, habitu saeculi undevicesimi vestiti, qui modo opera arte confecta, modo res perscrutantur naturales. Nam opera, nisi spectantur, sensim sine sensu gradatimque evanscunt. Verum, id quod multo magis est mirandum, ut opinor, sicut quadam in regula quadrata, qua haec imago includitur, conspicimus in marginibus chalcographiae, quomodo argumentum ac themata amplicificentur, - certe nobis admirationem suscitant calvariae animalium fabulosorum atque membrana antiquissima litteris incognitis conscripta, necnon varii homunciones cogitabundi ac solitarii -, ut latiusvideatur mirabile somniorum imperium propagari.

Scripsit Ansgarius Osloensis

---