Martis die 16 mensis Julii 2024

VETERA

Hic nonnulla olim publicata in versionibus anterioribus Ephemeridis reponemus ut facilius reperiantur a lectoribus.
Infeliciter, nonnulae litterae et alia signa typographica non bene agnoscuntur in novo systemate et sufficiuntur signo � . Ignoscite!

SCRIPTA HISTORICA ET BIBLIOGRAPHICA VICTORII CHIARROCCHI PISAURENSIS

Victorius Ciarrocchi solebat parvas symbolas historicas scribere in Grege Latine Loquentium, et licentiam nobis benigne dedit textus suos in Ephemeride edendi. Quod fecimus sub rubricis "Historia", "Biographiae" et "Memoranda". Ecce vobis "Biographiae":

De Iohanne Milton

De Iohanne Milton (1608 – 1674)

Quamquam de vita et scriptis Ioannis Milton, qui die 9 Dec. a. 1608 Londinii ortum habuit, non eodem modo viri quidam docti iudicarunt, is tamen in litterarum Anglicarum historia locum praeclarum occupat. Postquam anno 1632 studiorum curriculum Cantabrigiae perfecerat, linguam litterasque Graecas, Latinas, Italicas penitus comprehendere perrexit et carmina de variis rebus non modo Anglice, sed etiam Latine et Italice facilius panxit.

Annis 1638-39 itinera in Francogalliam, Helvetiam, Italiam suscepit: Florentiam, Romam, Neapolim visit et Galileum, cuius fama latius vulgata erat, gratulabundus convenit. Bello civili conflato regem Carolum I Stuart inter et nimiae sanctimoniae affectatores sive 'puritanos', quorum dux erat Olivarius Cromwell, huius viri factionem Ioannes Milton adeo amplexus est, ut non modo acriter doctrinam catholicam pontificumque potestatem impugnaverit, sed etiam puritanorum adversarios aspere pupugerit opere, quod 'Areopagitica' inscribitur. Anna Powell, quam anno 1642 adulescentulam is uxorem duxerat, nuptias diremit post unum mensem ex quo ipsae celebratae erant. Et hac praecipue de causa fautor divortii Ioannes factus est, posteaque duas mulieres (videlicet non eodem temporis spatio) uxores duxit.

Itaque septem liberis auctus est. Anno 1645 opus quoddam editum est, quo continentur omnia fere carmina, quae antea is composuerat. Carolo I obtruncato, cum istam necem aliqui improbavissent, Milton, quippe qui popularia iura et libertatem semper foverat, librum scripsit c. t. 'Pro populo Anglicano defensio' non sine acerbitate respersum praesertim in Claudium Saumaise sive Salmasium, virum Francogallum doctissimum.

Mortuo Cromwell (a. 1658) eversoque huius tyranni regimine, Ioannes in carcerem a. 1660 coniectus est et post aliquot menses liberatus. Paucis ante annis opus maius poeticum, quo narratur vita hominum in Paradisi hortis primum habitantium explicaturque cur deinde satores nostri ex loco illo amoenitatum pleno sint expulsi, componere coeperat. Quod poema non semel Latine redditum hoc titulo est: 'Paradisus amissus'. Eisdem annis librum 'De doctrina chistiana' edendum curavit et usque ad ultimos aetatis suae dies operam ad alia scripta componenda (v. g. ad librum, qui est 'De ampla artis logicae institutione') indesinenter navavit etiamsi valetudine improspera iam pridem adfectus esset. Hunc autem virum, qui die 9 Nov. 1674 mortuus est, indole parum amabili ac superciliosâ praeditum fuisse quidam adserunt. Utique in huius commemoratiunculae fine saltem unum carmen Latine ab Ioanne Milton compositum legere fortasse praestat:

Ad Leonoram Romae canentem (anno 1638 verisimiliter scriptum).

Angelus unicuique suus- sic credite gentes-
obtigit aethereis ales ab ordinibus.
Quid mirum, Leonora, tibi si gloria maior ?
Nam tua praesentem vox sonat ipsa Deum.
Aut Deus, aut vacui certe mens tertia coeli,
per tua secreto guttura serpit agens;
serpit agens facilisque docet mortalia corda
sensim immortali assuescere posse sono.
Quod si cuncta quidem Deus est per cunctaque fusus,
in te una loquitur, cetera mutus habet.
.-.-.-.-.-.-.-.-.-.-.-.-.-.-.-.-.-.-

Scripsit Victorius Ciarrocchi -Primum editum fuit 11/12/2008 22h00

De Henrico Toti, qui die 6 Aug. 1916 mortem obiit
De Hieronymo Pragensi, qui abhinc sexcentos annos crematus est
Quaedam de Ludovico XIV, Francogallorum rege (1661-1715)
In memoriam Davidis Balme...
Pro Dante Alagherio, qui anno MCCLXV ortum habuit
DE IOANNE BAPTISTA DELLA PORTA
De Carolo Gesualdo (1566-1613)
De Ioanne Bosco...
De Iosepho Maria Mazzolari (1712-1786)
De Americo Vespucci...
De Ioanna ab Arcu (1412-1431)
Leo primus
De Ioanne Baptista Morgagni...
De Roberto Busa (1913-2011)...
De Othone, domus Absburgicae principe
De Peregrino Artusi (1820-1911)
De Septimio Severo
Carolus Du Cange...
DE CAROLO BORROMAEO...
De Carolo Michelstaedter...
De Camillo Benso Cavour
De Michaele Ruggieri (1543-1607)
Eduardus VII
Quaedam de Iacobi Monod (1910-1976) doctrina philosophica
De Raimundo Montecuccoli
Caesar Lombroso
De vita actisque Alexandri III
Ioannes Calvinus
Imago nova sancti Pauli
Qui primus contra mafiam pugnabat...
De Alberto von Haller
De Ioanne Francisco Fernel (1497-1558)
De Anna Magnani (1908-1973)
De Ioanne Alfonso Borelli (1608-1679)
De Iosepho Occhialini (1907-1993)
De Mata Hari (1876-1917)
De Vincentio Filicaia (1642-1707)
Caesar Baronius (1538-1607)
De Rita Casciensi, sancta 'casuum impossibilium'
De Iacobo Casanova (1725-1798)
De Arturo Toscanini (1867-1957)
De Renata Tebaldi (1922-2004)
De Friderico Fellini
De Henrico Houdini (1874 - 1926)
De Ioanna Arendt (1906 - 1975)
De Aloysio Galvani (1737 - 1798)
De Greta Garbo (1905-1990)
De Arcturo Koestler (1905 - 1983)
De Othone Von Bismark
De Elemiro Zolla (1926-2002)
De Iacobo Leopardi (1798-1837)
Rochus (Rocky) Marciano, (1923–1969)
De Renato Cesarini, pedilusore singularissimo (1906-1969).
De Iusto Lipsio (1547- 1606)
De Antonio Quinn (1915-2001)
Theodericus Bonhoeffer (1906 - 1945)
De Alexandro Volta (1745-1827)
De Isabella, Hispanorum regina 'Catholica'
Die undecimo octobris 1963 obiit Editha Piaf