Logistorica

PAGINA IONATHAE STANISLAI GNOSIS
in uniuersitate Yalensi philosophiae doctor factus, stirpe Polonica ortus, ciuitatis Connecticutensis incola, linguae Latinae et Graecae fautor, Sancti Thomae Aquinatis discipulus.
https://www.latinusblogus.org/

pontificum summorum quos maximi habeo ii qui artium renascentium tempore ecclesiam gubernauerunt

Nicolaus papa V ecclesiam annis 1447-1455 gubernauit. bibliothecam Vaticanam condidit ac quinque milia librorum adeptus est. effecit ut multa opera Graeca Latine redderentur. Laurentium Vallensem scriptorem apostolicum fecit. sancti Petri basilicae antiquae aliquid destruxit ut basilica noua aedificaretur. imperium Portugallorum in Africam edixit et, id quod lamentandum sed memorandum est, eorum regi in iis quae "dum diuersas" appellantur litteris dicit "tibi Sarracenos et paganos aliosque infideles et Christi inimicos quoscumque et ubicumque constitutos...inuadendi conquerendi expugnandi et subiugandi illorumque personas in perpetuam seruitutem redigendi...plenam et liberam auctoritate apostolica tenore praesentium concedimus facultatem".

Pius papa II qui ecclesiam annis 1458-1464 gubernauit litteris antiquis operam magnam dedit. comoediam titulo Chrysin fabulamque titulo Euryalum et Lucretiam historiamque rerum Friderici imperatoris III scripsit. dum pontifex maximus est de se commentarios rerum memorabilium quae temporibus suis contigerunt scripsit. etiam misit ad Turcorum ducem epistolam qua ei fidem Christianam persuadere conaretur.

Paulus papa III ecclesiam annis 1534-1549 gubernauit. genere Farnesius et Pomponii Laeti discipulus erat. societatem Iesu iussit et concilii Tridentini initium fecit. eas quae "sublimis Deus" appellantur litteras edidit in quibus litteris dicit "Indos et omnes alias gentes ad notitiam Christianorum in posterum deuenturas licet extra fidem exsistant sua tamen libertate ac rerum suarum dominio priuatos seu priuandos non esse immo libertate et dominio huiusmodi uti et potiri et gaudere libere et licite posse nec in seruitutem redigi debere ac quicquid secus fieri contigerit irritum et inane nulliusque roboris uel momenti ipsosque Indos et alias gentes uerbi Dei praedicatione et exemplo bonae uitae ad dictam fidem Christi inuitandos fore...decernimus et declaramus". 

Pius papa V ecclesiam annis 1566-1572 gubernauit. ante pontificatum theologiam et philosophiam docuerat. pontifex maximus factus copiarum suarum et Hispanorum et Venetorum societatem militarem condidit ut Turci uincerentur, id quod Naupacti factum est. eas quae "quo primum" appellantur litteras edidit in quibus litteris de eo missali quod edi iussit dicit "....neue praesules administratores canonici capellani et alii quocumque nomine nuncupati presbyteri saeculares aut cuiusuis ordinis regulares ad Missam aliter quam a nobis statutum est celebrandam teneantur neque ad missale hoc commutandum a quolibet cogi et compelli praesentesue litterae ullo umquam tempore reuocari aut moderari possint sed firmae semper et ualidae in suo exsistant robore similiter statuimus et declaramus."

Scripsit Ionathas Gnosis

---