Logistorica

PAGINA IONATHAE STANISLAI GNOSIS
in uniuersitate Yalensi philosophiae doctor factus, stirpe Polonica ortus, ciuitatis Connecticutensis incola, linguae Latinae et Graecae fautor, Sancti Thomae Aquinatis discipulus.
https://www.latinusblogus.org/

de politiae Francicae euersione et linguis

in Francia ante monarchiam finitam adhibebantur multae linguae quarum ea quidem quae Francica appellatur Lutetiae adhibebatur sed extra urbem per Franciae partem septentrionalem uaria erat, lingua autem Francoprouincialis in Franciae partibus media orientalique et lingua Occitana in parte australi in usu erat. plures quam triginta linguas Henricus Gregorius numerabat. idem rebatur linguam Francicam 3,000,000 homines quae populi pars decima erat adhibere. ii qui rebus politicis euersis potestatem obtinebant primo ea quae decreuerant praeter linguam Francicam in linguas alias reddebant sed mox existimabant "rei publicae unitas sermonis unitatem poscit." anno 1791 Carolus Mauritius Tallerandus dixit "in schola omnes lingua constitutionis et legis docebuntur, et haec sermonum corruptorum massa hae feodalismi reliquiae ultimae euanescere cogentur." et anno 1793 Henricus Gregorius dixit "maioris momenti est hanc linguarum uulgarium diuersitatem modo politico exstirpare quam rationis infantiam et praeiudicii senilitatem producere". porro ei relationi quam Henricus Gregorius anno 1794 edidit erat hic subtitulus: "de necessitate et methodis efficiendi ut linguae praeter Francicam aliae non iam in usu sint et lingua Francica ab omnibus adhibeatur" et is dixit "linguae unitas est politiae euertendae pars necessaria. nobis ad efficiendum ut superstitio expellatur et homines propius ad ueritatem perducantur et ingenia promoueantur et uirtus confirmetur et omnes ciues in uniuersitatem nationalem effingantur et machinae politicae mechanismus in simplicitatem reducatur leuiusque operetur, necesse est linguam communem habere." atque ea aetate haec decreta sunt: "discipuli docendi sunt ut sine uitio lingua Francica loquantur legant scribant" et "lingua Francica in omni ciuitate cuius incolae ea non loquuntur docebitur." eheu! qualia accidunt quando lingua Latina non in usu est.

Scripsit Ionathas Gnosis

---