Martis die 16 mensis Julii 2024

VETERA

Hic nonnulla olim publicata in versionibus anterioribus Ephemeridis reponemus ut facilius reperiantur a lectoribus.
Infeliciter, nonnulae litterae et alia signa typographica non bene agnoscuntur in novo systemate et sufficiuntur signo � . Ignoscite!

DISTICHA CAECILIANA

Caecila Koch Monasteriensis solebat disticha scribere ET RECITARE de variis rebus nuperrime gestis. Placet eam denuo auscultare.

 

Disticha Februaria MMIX

 albinus2@alcuinus

De Nadya Suleman, quae nuper in California octo infantes simul peperit, cum iam sex liberos haberet

Vera mihique tibique canatur fabula, Musa:
in California erat femina maesta et egens,
coniuge quae misere deserta ac relicta dolebat.
In votis fuerat nam numerosa domus
multis cum liberis… sed quidnam est tempore nostro,
quod non arte nova efficiant medici?
Ignoti mulier concepit semine fetum
in gremioque tenet mox hilarem puerum.
Vix infans coepit risu cognoscere matrem (1),
mater cum cupide rursus adit medicum:
"Tam Lepidus, tam pulcher", ait, "mihi filius ope
auxilioque tuo est: nunc iuva me, oro, iterum!"
Quoque deinde anno nunc infans nascitur illi
patribus ignotis; denique sex liberi
angustas alacres clamant curruntque per aedes.
Sed quaestu atque viro cum genetrix careat,
quonam tanta modo, dic, denique, turba novella
sustentabitur haec? Nam licet auxilio
adsit matris mater, difficile est tamen: aegre
lecti tam multis sufficiunt liberis;
non est mensa capax cunctis, cibi capiuntur
vicibus alternis; concipere at genetrix
mox rursus desiderat, ut sit septimus infans.
Ut simper, fetos inserit idem utero
nunc medicus complures, saltem ex omnibus unus
gaudentis matris mox cubet in gremio.
Quantum autem medicus miratur, cum videt omnes
vivos et validos ex utero genitos!
Octo sunt; gaudet genetrix, irascitur illi
– quippe operam metuens – tot liberorum avia.
Primum vix septennem, bimos esse gemellos
ingemit illa: "Omnes sane ego amo liberos;
cur sed nil parcit matri mea filia fessae?
Octo cur genuit nunc etiam? Modus est
none et in his rebus, non certi denique fines (2)?
"At desiderium", filia, "semper erat
large impleta domus dilectis, mater, alumnis.
Ipsa ego sola fui; non era tuna soror
seu frater, mecum ludis communibus aeque
qui gauderet, quem participem facerem
omnis secreti…" Fortunae poena paratur
num tibi nunc, avia? "Gnata sit una satis",
dicebas quondam, "plures curare molestum est."
Quattuor infantes, cogita,, vel modo tres
olim si genuisses, nunc non turba nepotum
bis septenorum esset alenda tibi.
"O ne quid nimium", scimus veteres monuisse;
haec sed verba minus cognita: "... neve parum!"

(1)Verg. Ecl. 4, 60: Incipe, parve puer, risu cognoscere matrem.
(2) Hor. Serm. 1,1, 106: Est modus in rebus, sunt certi denique fines.

-Primum editum fuit 10/03/2009 22h02

Profectae de profectura
Disticha Augusta MMIX
Disticha Iulia MMIX
DISTICHA IUNIA MMIX
DISTICHA MAIA MMIX
DISTICHA MARTIA MMIX
Disticha Ianuaria 2009
Disticha Ianuaria 2008
Disticha decembria 2007
Disticha Novembria 2007
Disticha octobria 2007
Disticha Septembria 2007
Disticha Augusta MMVII
Disticha Iulia MMVII
Disticha Iunia MMVII
Disticha Maia 2007
Disticha Aprilia 2007
Disticha Martia 2007
Disticha Februaria MMVII
Disticha Ianuaria MMVII
Disticha Decembria anno 2006
Disticha Novembria 2006
Disticha Octobria 2006
Disticha Septembria 2006
Disticha Augusta 2006
Disticha Iulia 2006
Disdicha Iunia 2006
Disticha Maia 2006
Disticha Aprilia 2006
Disticha Martia 2006
Disticha Februaria 2006
Disticha Ianuaria 2006
Disticha Decembria 2005
Disticha Novembria 2005
Disticha Octobria 2005
Disticha septembria 2005