Martis die 16 mensis Julii 2024

VETERA

Hic nonnulla olim publicata in versionibus anterioribus Ephemeridis reponemus ut facilius reperiantur a lectoribus.
Infeliciter, nonnulae litterae et alia signa typographica non bene agnoscuntur in novo systemate et sufficiuntur signo � . Ignoscite!

DISTICHA CAECILIANA

Caecila Koch Monasteriensis solebat disticha scribere ET RECITARE de variis rebus nuperrime gestis. Placet eam denuo auscultare.

 

Disticha Aprilia 2007

 Multa, puto, mulier gaudet curarier ungues:

De vacca in urbe Hannovera saeviente
Videte rubricam "Insolita"

Multa, puto, mulier gaudet curarier ungues:
cosmetes aditur, non minimo pretio
ungues qui atque manus tepidis prius imbuat lymphis,
depsat dein palmas fortiter ac strenue,
ut pistor butyro ovisque et lacte farinam
depsit permixtam, splendida crustula mox
alliciant oculos ut praetereuntis, odores
praetemptent naris dulciter et lepide.
Sic splendent digiti matronae luxuriosae,
reginae similis quae sedet atque manus
praebet depsendas strenue famulis studiosis,
sic et olent – eheu, lector, ignosce, precor,
non ut crustula olent digiti unguentis pretiosis
imbuti, at potius floribus et foliis
tureque odorata stillant opobalsama palmis.
Laeta domum posthac ecce redit, digitos
pernitidos ostendit amicae, deinde marito:
illa admiratur, corripit hic pretium.
Sic gaudet mulier, si ungues pulchre expoliuntur.
Non sensit tamen hoc Ursula vacca modo,
nuper quae medicum resecaturum horruit ungues,
erupit stabulo terribili rabie.
Non opobalsama suavia, credo, illi subolebant,
sed runcina ferox culter et horribilis.
Quapropter fugit medicum commota timore;
mox iam naturo filiolo gravida,
ut mos est gravidarum, animo irritabilis atque
impos erat mentis perniciterque ruit
urbis per plateas, in currus, saeptaque et hortos
irrumpit, birotas frangit et ante domos
arbusta et dumeta delet, vigilesque sequuntur
vaccam et custodes; non tamen sistere eam
ullo more valent. Cum praebet se angulus aptus,
quo illam compellant, vi fugit horribili:
corpore pergrandi, torvo vultu imminet illis.
Spectant ridentes talia multi homines,
mirantes tam rarum aspectum: bucula currens,
quam exanimis sequitur per fora, per plateas
turba suburbanas, tam tranquillae placidaeque
quae esse solent! Demum vespere iam frigido
contigit adveniente ad murum vaccam agitare:
horti sub magnis arboribus pavida
constitit aedes ante altas, non exitus ullus
iam patet - ecce petunt multa soporifera
tela illam, geminaque teguntur lumina nocte (1),
atque veneni vi vincitur iam rabies.
Viribus en iunctis domino dein victa iuvenca
redditur, in stabulo qui vigilanter abhinc
inclusam servabit. Nunc sunt restituendi
hortique et muri, fracta vehicla, rotae.
Cur tantum mulier curari percupit ungues,
bucula sed tanto aufugit illa metu?

(1) Catulli carm.51, 11-12

-Primum editum fuit 03/05/2007 20h12

Profectae de profectura
Disticha Augusta MMIX
Disticha Iulia MMIX
DISTICHA IUNIA MMIX
DISTICHA MAIA MMIX
DISTICHA MARTIA MMIX
Disticha Februaria MMIX
Disticha Ianuaria 2009
Disticha Ianuaria 2008
Disticha decembria 2007
Disticha Novembria 2007
Disticha octobria 2007
Disticha Septembria 2007
Disticha Augusta MMVII
Disticha Iulia MMVII
Disticha Iunia MMVII
Disticha Maia 2007
Disticha Martia 2007
Disticha Februaria MMVII
Disticha Ianuaria MMVII
Disticha Decembria anno 2006
Disticha Novembria 2006
Disticha Octobria 2006
Disticha Septembria 2006
Disticha Augusta 2006
Disticha Iulia 2006
Disdicha Iunia 2006
Disticha Maia 2006
Disticha Aprilia 2006
Disticha Martia 2006
Disticha Februaria 2006
Disticha Ianuaria 2006
Disticha Decembria 2005
Disticha Novembria 2005
Disticha Octobria 2005
Disticha septembria 2005