 |  |  |
| Martis die 16 mensis Julii 2024 | ||
|
Latine loqui disce!!
==============
============= |
VETERA
Hic nonnulla olim publicata in versionibus anterioribus Ephemeridis reponemus ut facilius reperiantur a lectoribus.
Infeliciter, nonnulae litterae et alia signa typographica non bene agnoscuntur in novo systemate et sufficiuntur signo � . Ignoscite!
DISTICHA CAECILIANA
Caecila Koch Monasteriensis solebat disticha scribere ET RECITARE de variis rebus nuperrime gestis. Placet eam denuo auscultare.
Disticha Ianuaria 2009
De Obamae proposito carcerem Guantanamensem claudendi De Obamae proposito carcerem Guantanamensem claudendi
„Mutamen!" cupide conclamat America tota;
omnis laetatur duce novo populus.
Est Afer, tota patriam testante figura:
Nigra et torta coma est, fusca colore cutis (1).
Congaudent alii populi, quod munere cessit
Arbustus, nulli qui prope carus erat.
Ille duces alios nam verbis saepe superbis
offendit; non ius illius intererat
gentium ut respiceret, curabat foedera nulla.
Nunc autem novus est dux, iuvenis, lepidus,
iustus qui merito atque humanus creditur esse
ac „mutamina" nunc plurima magnaque vult
efficere, in melius mutentur ut omnia. Gaudent
omnes iam cives; iustitiamque homines
omnibus in terris demum sperant redituram.
Sperant ante omnes multi Arabes miseri,
vincula captivos in carcere Guantanamensi
iam quos dura tenent tempora longa, licet
esse ipsis custodibus insontes videantur,
contra legem omnem nec sine terribili
tormento nec contra ullo dicente patrono.
Tale ab America atrox dedecus absit abhinc!
Ecce novi primum decretum principis: Omnes
mittere iam causas iudicem Obama iubet.
Cessent tormenta, claudatur carcer et ipse,
ducant inde reos mox alio milites,
inquiratur ubi iuste et prudenter in illos,
poenas et meritas denique quisque luat
iudices nec iam satient crudeliter iram.
Insontes abeant denique iamque diu
ante negata iniuste libertate fruantur.
Suspirant patrias, crede, domosque suas;
multis autem, quo cupiunt, nunc ire negatum,
namque illic reduces altera vincla manent.
Quo iam se vertant? Forte inquis: „America quidni
omnibus his sedes hospitiumque fiat?"
Sed non tam facilis res haec est, candide lector:
Hostis habetur ubi, vivere quis poterit
vicinos inter, qui illum oderuntque timentque?
Nec vanus timor est, nam licet ante mala
captivi nunc dimittendi nulla patrarint,
sive gregum socii sive duces etiam
perniciosorum per tempora longa fuere.
Omnis America erat semper eis odio;
nunc multo magis est turpissima vincula passis.
Europae ergo illos recipiant populi?
Cunctantur; nec enim pergrandis America sola
his odio est: Etiam forsitan afficient
ignivomis globulis mox Gallos sive Batavos…
Multi aiunt: „Cura haec nostrane sit? Miseros
dimissos homines modo America collocet ipsa!
Ipsi exedite nunc fortiter haec eadem,
ipsi quae vobis ante intrivistis, amici."
Respondent alii: „Claudere cum cupiat
carcerem illum infamem, constanter iuvemus Obamam!
Omni dignum est hoc propositum auxilio.
Quin et nos igitur captivos excipiamus?"
Haec sed parva est res: Scilicet hoc gravius
est multo, non ultra insontes quod cruciantur.
Dique hominesque omnes proposito faveant!
(1) Pseud.-Verg. Moretum 32-35:
Afra genus, tota patriam testante figura,
torta comam labroque tumens et fusca colore,
pectore lata, iacens mammis, compressior aluo,
cruribus exilis, spatiosa prodiga planta.(Ultimi duo versus mihi non ad Obamam referendi videbantur.
J )Scripsit Caecilia Koch
-Primum editum fuit 02/02/2009 22h17
Profectae de profectura
Disticha Augusta MMIX
Disticha Iulia MMIX
DISTICHA IUNIA MMIX
DISTICHA MAIA MMIX
DISTICHA MARTIA MMIX
Disticha Februaria MMIX
Disticha Ianuaria 2008
Disticha decembria 2007
Disticha Novembria 2007
Disticha octobria 2007
Disticha Septembria 2007
Disticha Augusta MMVII
Disticha Iulia MMVII
Disticha Iunia MMVII
Disticha Maia 2007
Disticha Aprilia 2007
Disticha Martia 2007
Disticha Februaria MMVII
Disticha Ianuaria MMVII
Disticha Decembria anno 2006
Disticha Novembria 2006
Disticha Octobria 2006
Disticha Septembria 2006
Disticha Augusta 2006
Disticha Iulia 2006
Disdicha Iunia 2006
Disticha Maia 2006
Disticha Aprilia 2006
Disticha Martia 2006
Disticha Februaria 2006
Disticha Ianuaria 2006
Disticha Decembria 2005
Disticha Novembria 2005
Disticha Octobria 2005
Disticha septembria 2005
|
|
|
|
