Martis die 16 mensis Julii 2024

VETERA

Hic nonnulla olim publicata in versionibus anterioribus Ephemeridis reponemus ut facilius reperiantur a lectoribus.
Infeliciter, nonnulae litterae et alia signa typographica non bene agnoscuntur in novo systemate et sufficiuntur signo � . Ignoscite!

DISTICHA CAECILIANA

Caecila Koch Monasteriensis solebat disticha scribere ET RECITARE de variis rebus nuperrime gestis. Placet eam denuo auscultare.

 

Disticha Martia 2007

 02

De vacca carnivora et formicis monachos vexantibus
(cf. Craterem Nugarum & Insolita)

Extremos apud Indos aurea regnat, amici,
pax pietasque: Homines nulla animalia vi
afficiunt umquam, nam sacra est vita cuiusque.
Non tamen omne animal tam placidum esse potest,
nec pietate pecus sacrum et venerabile, vacca,
usque tenetur ea, quam exhibuere homines
semper ei: nam vico in quodam mira iuvenca
nocte rapit pullos tigridibus similis.
Miratur vicus totus; miratur et ille,
qui vidit stabulo saepe perire suo
pullos et gallinas, suspectum sed habebat
vicinive canem sive suum. Tacite
quondam per noctem ad stabulum cum pervigilaret,
ut caperet fures, ecce iuvenca venit,
aggreditur stabulum, dein pullum dente feroci
luctantem arripit et devorat en miserum.
Obstupuit dominus. „Quid? Tigris forsitan olim
vita nata alia nostra iuvenca fuit?"
Forsan, amice, fuit. Fortasse et turba renata
est formicarum de tigridum gregibus,
assidue in templo monachos quae vexat remoto,
mordens in somno tempore noctis eos,
quin etiam in precibus. Templi tranquillus in hortis,
ut monachi officium est, si resides viridi
iam meditaturus densae sub tegmine palmae,
arboris umbrosis desilit e foliis
una ex turba permordax formica frequenter
perturbatque animum. Quam pius esse debet
et sapiens meditator, talia qui ferat aequo
sic animo! Miseri quid faciant monachi?
Occidant formicas? Non licet his animanti
quicquam afferre mali. Terribili sonitu
ferrea eas haurit clamans ululansque Charybdis,
incolumes posthac evomitura alibi.
Sed tamen, heu, nimium formicis palma placebat
In monachorum horto; mox totidem reduces
adsunt formicae numeroque modoque carentes.
Vincitur iam pietas: interimendus erit
Totus grex formicarum! Sed quis necet illas?
Ipsi num monachi? O scelus horribile!
Arcessunt igitur quendam doctum atque peritum,
omnes qui occidat. Qui pietatem homines
erga animalia servent, his animalibus ipsis
cum sit nulla pios erga homines pietas?

-Primum editum fuit 04/04/2007 21h23

Profectae de profectura
Disticha Augusta MMIX
Disticha Iulia MMIX
DISTICHA IUNIA MMIX
DISTICHA MAIA MMIX
DISTICHA MARTIA MMIX
Disticha Februaria MMIX
Disticha Ianuaria 2009
Disticha Ianuaria 2008
Disticha decembria 2007
Disticha Novembria 2007
Disticha octobria 2007
Disticha Septembria 2007
Disticha Augusta MMVII
Disticha Iulia MMVII
Disticha Iunia MMVII
Disticha Maia 2007
Disticha Aprilia 2007
Disticha Februaria MMVII
Disticha Ianuaria MMVII
Disticha Decembria anno 2006
Disticha Novembria 2006
Disticha Octobria 2006
Disticha Septembria 2006
Disticha Augusta 2006
Disticha Iulia 2006
Disdicha Iunia 2006
Disticha Maia 2006
Disticha Aprilia 2006
Disticha Martia 2006
Disticha Februaria 2006
Disticha Ianuaria 2006
Disticha Decembria 2005
Disticha Novembria 2005
Disticha Octobria 2005
Disticha septembria 2005