Martis die 16 mensis Julii 2024

VETERA

Hic nonnulla olim publicata in versionibus anterioribus Ephemeridis reponemus ut facilius reperiantur a lectoribus.
Infeliciter, nonnulae litterae et alia signa typographica non bene agnoscuntur in novo systemate et sufficiuntur signo � . Ignoscite!

DISTICHA CAECILIANA

Caecila Koch Monasteriensis solebat disticha scribere ET RECITARE de variis rebus nuperrime gestis. Placet eam denuo auscultare.

 

Disticha Septembria 2006

 Disticha Septembria

De nova „Argo" constructa (cf. „Scientias")

Non nobis primum peregrinandi orta cupido,
qui ignotas terras saepe novas petimus,
sive frigora nostra ut vitemus, seu oblectent
ut loca non nobis nota animum atque oculos;
immo etiam heroes primaevi temporis olim
commiserunt se caeruleo pelago,
quod non ausus erat prius ullus. Peliacarum
silvarum pinus caedere constituunt,
navem pergrandem faciunt, quam remus et aura
per Pontum ferrent, vellus ut expeterent
auri. Qui poterant Symplegades et superare
atque procellas, quas di dederant rabidas?
Miramur, qui vix salvi incolumesque venire
nostris navigiis, quo volumus, possumus,
ferreus alveus iam quorum stridore repletur
ardentique oleo pellitur ecce rota.
Nonne frequens navis, trans Aegaei maris undas
quae modo pernicior igne volabat ad hunc
sive illum portum, peregrini ut perveherentur
litora ad iucunda, lucrum alii ut facerent,
nunc submersa iacet dira robigine victa?
Hoc facere antiqui quo potuere modo?
Hoc quidam ut scierent, nunc rursus Peliacarum
silvarum pinus caedere constituunt,
navem Argous similem faciunt, quam remus et aura,
non ardens oleum, dein veherent per aquas.
Qui sunt? Non heroes, ut olim, sed sapientes
et docti: omnia, quae tradita dictaque sunt
Argonautarum de erroribus atque periclis,
hi legere. Ergo cognita sunt miseris
omnia, quae impendunt: terra natique gigantes
primum, saevaque dein multa procella; manent
Bebryces pugnaces post et amore furentes
Nymphae, quae pulchros eripiunt iuvenes,
denique grex volucrum pennis armatus aenis
necnon saevus aper, bellicae Amazonides…
Deerit at Lynceus, oculis praeclarus et omnes
excellens visu, deerit et validus
Hercules et Mopsus vates, deerit Polydeuces,
pugnis non ulli qui superandus erat,
Orpheus et cantor, divina voce valebat
qui placare undas. Quid faciant miseri?
Doctrina et libris credunt se vincere posse
monstra illa? Aut forsan machina cantat eis
disco ex compacto? Bene; sed satis haec erit undis?
Non credo. Coeptis saltem et Athena favet,
Argonautis sacra olim Dodonide quercu
ramum depromptum quae dederat magicum?
Non habet hunc iam ramum nostri temporis Argo.
Sic credetis vos caeruleo pelago?
O prius, oro vos, Pallanti sacrificate
Neptuno et magno votaque suscipite!

-Primum editum fuit 01/10/2006 08h27

Profectae de profectura
Disticha Augusta MMIX
Disticha Iulia MMIX
DISTICHA IUNIA MMIX
DISTICHA MAIA MMIX
DISTICHA MARTIA MMIX
Disticha Februaria MMIX
Disticha Ianuaria 2009
Disticha Ianuaria 2008
Disticha decembria 2007
Disticha Novembria 2007
Disticha octobria 2007
Disticha Septembria 2007
Disticha Augusta MMVII
Disticha Iulia MMVII
Disticha Iunia MMVII
Disticha Maia 2007
Disticha Aprilia 2007
Disticha Martia 2007
Disticha Februaria MMVII
Disticha Ianuaria MMVII
Disticha Decembria anno 2006
Disticha Novembria 2006
Disticha Octobria 2006
Disticha Augusta 2006
Disticha Iulia 2006
Disdicha Iunia 2006
Disticha Maia 2006
Disticha Aprilia 2006
Disticha Martia 2006
Disticha Februaria 2006
Disticha Ianuaria 2006
Disticha Decembria 2005
Disticha Novembria 2005
Disticha Octobria 2005
Disticha septembria 2005