Martis die 16 mensis Julii 2024

VETERA

Hic nonnulla olim publicata in versionibus anterioribus Ephemeridis reponemus ut facilius reperiantur a lectoribus.
Infeliciter, nonnulae litterae et alia signa typographica non bene agnoscuntur in novo systemate et sufficiuntur signo � . Ignoscite!

DISTICHA CAECILIANA

Caecila Koch Monasteriensis solebat disticha scribere ET RECITARE de variis rebus nuperrime gestis. Placet eam denuo auscultare.

 

Disticha Ianuaria MMVII

 De puella Americana hormonis curata, ne adolesceret (cf

De puella Americana hormonis curata, ne adolesceret (cf. Socialia)

Viculus est quidam, quo vivit parva puella
felix atque hilaris valde et amata suis.
Diligit illa patrem, matrem, fratrem atque sororem;
ludere sed cum illis, candide lector, eam
si credes, „Utinam!" respondebunt genitores.
Non umquam compos filia mentis erat.
Annum iam sextum degens nil, forte trimestris
infans quod nequeat, illa puella potest.
In pulvino immota cubat; si vocibus illam
blandis appellas, laeta hilarisque ridet,
verba sed ut capiat, spes nulla. Crepundia parva
porrige: non manibus retinet illa: cadunt
in terram. Vitam sed agit laetam atque beatam:
Cum sentit matrem sive venire patrem,
fratrem sive sororem, infantis more puella
gaudet, laetatur; carmina si exhibeas
auscultanda, manus iactat laeta atque renidet;
si ludunt alii, spectat eos avide.
Iamiam crescere se non sentit parva puella,
crescit sed rapide, ubera iamque fiunt,
quasi esset plenis iam virgo nubilis annis,
iam matura viro ; iamque pater metuit
et mater: „Quid, si portari filia nostra
mox non iam poterit? Forsan in perpetuum
sola in conclavi atque cubili affixa iacebit,
cum tantum cupiat semper adesse suos?
O miseram!" Miseris medicus sed denique suadet:
„Efficere id possum, ut crescere desinat, et
semper sit brevis atque levis." Gaudentque parentes
atque suae gnatae mox medicamina dant,
totam ut per vitam servetur parva puella.
Exhorrent multi: „Sic mutilare nefas
est hominem! Crudeles sunt medici atque parentes,
qui gnatae miserae non adolescere iam
permittunt! Naturam sic pervertere possunt?
Ne medici credant esse deos homines!"
Respondent alii: „Non umquam mente adolescet;
infans semper erit. Quid noceat, maneat
parvum si corpus? Non sentiet illa. Putatis
naturam eversam? Non medicina omnis
mutat naturam? Vitrorum si arte iuvabis
forte hebetes oculos, dentibus et putribus
sive aderit medicus, natura inflectitur usque."
Quod tibi iudicium, candide lector, erit?

-Primum editum fuit 05/02/2007 22h21

Profectae de profectura
Disticha Augusta MMIX
Disticha Iulia MMIX
DISTICHA IUNIA MMIX
DISTICHA MAIA MMIX
DISTICHA MARTIA MMIX
Disticha Februaria MMIX
Disticha Ianuaria 2009
Disticha Ianuaria 2008
Disticha decembria 2007
Disticha Novembria 2007
Disticha octobria 2007
Disticha Septembria 2007
Disticha Augusta MMVII
Disticha Iulia MMVII
Disticha Iunia MMVII
Disticha Maia 2007
Disticha Aprilia 2007
Disticha Martia 2007
Disticha Februaria MMVII
Disticha Decembria anno 2006
Disticha Novembria 2006
Disticha Octobria 2006
Disticha Septembria 2006
Disticha Augusta 2006
Disticha Iulia 2006
Disdicha Iunia 2006
Disticha Maia 2006
Disticha Aprilia 2006
Disticha Martia 2006
Disticha Februaria 2006
Disticha Ianuaria 2006
Disticha Decembria 2005
Disticha Novembria 2005
Disticha Octobria 2005
Disticha septembria 2005