CINEMATA

UNA VITA (ONE LIFE)

Tot pueri a viro diu incognito servati sunt

MMXXIII REGNUM UNITUM

Regimen spectaculi: Iacomus Hawes

Histriones maximi momenti: Anthonius Hopkins: Nicolaus Winton senex; Iohannes Flynn: Nicolaus Winton iuvenis; Helena Bonham Carter: Babi Winton; Lena Olin: Greta Winton; Romola Garai: Dora Warriner; Ionathas Pryce: Martinus Blake.

 Opus filmicum ex re vera constat sumpta a libro de vita  beneficentissimi et audacissimi viri.   Actio incipit anno MCMXXXVIII, paulo antequam Secundum Bellum Mundanum exardescat. Nicolaus Winton , Britannicus, nummis mercandis curatur, providens Germaniam Hitlerianam  mox Europam invasuram esse,  existimavit morandi tempus non superesse, sed necesse operam dare  ut consilium pararetur  “Translatio puerorum” postea appellatum. Cum Pragam advenisset, ope invocata a Martino Blake, qui auxilium ei petierat pro grege Britannico profugorum Cecoslovachiae, adiuvantibus etiam Dora Warriner et matre a Londinio, fecit ut octo tramina proficiscerentur vectis  centenis pueris, plerumque Hebraeis.  Demum Londinium ducti a familiis hospitio accipiebantur. Nonum tramen retentum est a militibus Germanis, quod eodem die, Kalendis Septembribus  anno MCMXXXIX,  exercitus Hitlerianus Poloniam invasit et  pueri  exitium plerumque obierunt.  Audax vir DCLXIX pueros conservavit, sed totum inceptum decem milia salvos eduxit. Transactis quadraginta annis a belli exitu  in televisifica exhibitione “Haec est vita”, cui Nicolaus intererat, spectatores e sella surrexerunt  qui honorem tribuerent illi qui forti animo et magna constantia opem dederat ut ipsi pueri incolumes a belli atrocitate evaderent.

Histrio princeps senex  (Antonius Hopkins) peritia, ut solet, excellit, tamen quod praecipuum est, pellicula ostendit scaenas miserabiles castrorum profugorum, velut, e.g., parentes a filiis seiunctos,  puellam duodecim annorum cum infante nuper nato; pueros cibum petentes, itinera  periculose tramine  facta.  Tot fuerunt tamen homines et feminae  qui, deposita beneficiorum memoria, a nazistis vexatos servaverunt.

 

Scripsit Lydia Ariminensis

---