ARS VIVENDI

LAGANUM HORATII POETAE

De pasta segmentata

 

 

Nota permultis sunt lagana (Italice lasagna)  more Bononiensi parata, pasta tracta farina et ovis confecta quodam olere mixta,  iure carneo, caseo Parmensi, salsa Bechameil, delicatissimum  obsonium. Lasagne sunt verisimiliter Latine lagana, ut hodierno tempore hic cibus appellatur in regionibus Italiae Meridionalis Campania et Lucania, (lagane). Aliter vocatur et aliis rebus conficitur in variis Italiae partibus.  

Suntne antiqua lagana  avae laganorum huius aetatis? Marcus Gavius Apicius, qui vixit primo saeculo p.C.n., coquus, peritus artis coquinariae, scriptor fuit.  III vel IV saeculo opus  decem librorum De re coquinaria conscriptum est ei tributum, adiunctis, ut videtur, multis praeceptis coquinariis aliorum auctorum. In IV et VIII libro lagana tractantur, unde colligi potest pastam tractam fuisse, confractam iuri adiunctam. Ex libro IV: “cum furberit, tractam confriges, obligas”; ex libro VIII: “tractam siccatam confringes et partitibus caccabo permisces”.

Lagane aliter sumptae in quibusdam regionibus Italiae Meridionalis sunt pastae oblungae segmentatae, sine ovis confectae,  quae sorbitioni adiunguntur cum phaselis, ciceribus, lenticulis.  Cibus hodiernus et antiquissimus: etiam Horatius poeta hanc dapem rusticam dilexit, ut  in Serm.I, 6, 114-115 legimus: “inde domum me/ad porri et ciceris refero laganique catinum.”

Scripsit Lydia Ariminensis

---

DE POPINARIIS HESPERIIS HAC TEMPESTATE IN ORIENTE POSITIS
SECUNDA MENSA