RELIGIO

          DE EPIPHANIA

Finem temporis Natalicii designat

Epiphania, Graece Ἐπιφάνεια (ex ἐπιϕαίνομαι =appareo) temporis Natalicii dies sollemnis est, quo commemoratur θεοφάνια Iesu Christi  Filii Dei, qui caro factus est.  Religio Christiana occidentalis hoc die festo visitationem et adorationem Regum Magorum ante cunas pueruli Iesu revocat, sed in Orienti Christiano  Baptisma Iesu in flumine Iordani et miraculum nuptiarum Canae memorantur.
Epiphania celebratur a.d.VIII Id. Ianuarias a sequentibus calendarium Gregorianum, a.d.XIV Kal.Febr. a Christianis Orientalibus ex calendario Iuliano.   
 

In laographia Italica “Befana” (ex Epiphania) benefica anicula  est quae nocte proxima ante Epiphaniam  descendens ex camino dona affert pueris, repletis tibialibus a parentibus apud focum relictis. 
Quomodo conectitur donifica persona Regibus Magis? Befana fingitur velut anicula naso adunco et mento acuto, lata veste neglecta, calceis subtritis, quae scopa vecta, onerata magno sacco, ludicra et dulcia dispensat pueris parentibus oboedientibus, sed interdum  carbonem indocilibus.  Fama est reges Magos, cum iter facerent Bethlehem, postquam deerraverant, viam ex quadam vetula quaesivisse, deinde illam hortatos esse ad se sequendos. Anicula  monitum recusavit, sed deinde eam  hoc penituit, ideo illos exquirere temptavit, sed frustra. Tum cum sacco donis repleto coepit ostium pulsare domorum, ut dulcia donaret omnibus pueris, spem concipens unum eorum Iesum esse.  

Scripsit Lydia Ariminensis- 07/01/2025 10h23

---

SYNODUS DE SYNODALITATE AD EXITUM PERVENIT
DE PASCHA CELEBRANDA
DE PRAESEPIS ORIGINE
DE SYNODO QUAE DE SYNODALITATE AGIT
“VERITATIS SPLENDOR”, QUID DE RE MORALI POST ANNOS XXX?