CHRONICA LYCI AUSTRIACI

De rebus variis.

Quis sim

Quis sim, quis fuerim, benigne lector,
paucis versiculis tibi explicabo.

Natus Graecii in urbe Styriensi
linguis me dare classicis ibidem
coepi. Non veteres modo colebam:
Ut temptarem etiam recentiora,
ad terras animus tulit studentem,
et natura marisque montiumque
qualiscumque foret, mea interesse
coepit. Discipulos meos utramque
rem multos docui in schola per annos.
Donato rude restat, ut voluptas
quaedam percipiatur ex poesi.
Oblectamina forte si requiris,
haec sunt: musica me solet tenere,
clavilique canens ago otiosas
horas. Deinde vehicla sunt vetusta
(Inprimis Citroen) mihi colenda,
qua re numquam ego iam carere vellem.
Multis denique rebus occupato
numquam, crede, molesta fit senectus.