NUNTII TELEVISIFICI EPHEMERIDIS

Olim Nuntii Finnici

NUNTII FINNICI 05/01/2026

Optimi spectatores, Hodie est dies quintus mensis ianuarii. Ecce nuntii quos vobis recitat Suovi Tuominen.

Praesidens Donald Trump  dicto Russorum, ex quo domicilium praesidentis Russiae Vladimir Putin ab Ucrainis dronis petitum sit, non iam credit, quamquam antea rali rumori fidem habere videbatur.

Impetibus in Venetiolam factis omnino octoginta milites et cives interfectj sunt. Dicunt paene omnes custodes corporis praesidentis Maduro mortuos esse. Praesidens Donald Trump ait Americanos ln Venetiola iam dpminari.

Copiae Americanae Venetiolam aggressae praesidentem civitatis Nicolas Maduro cum coniuge deprehenderunt et eum per vim abductum Novum  Eboracum deportaverunt. Accusatur de gravibus sceleribus ad drogas pertinentibus.

In Irania sumptus victuales valde creverunt, quo facto inter magistratus et cives incremento  pretiorum reclamantes conflictus violenti coorti sunt. Illis tumultibus saltem sedecim homines vitam amisere et amplius quingenta deprehensi sunt.

E Corea Septentrionali missile ballisticum ad Mare Iaponicum versus emissum est. Rerum periti censent illud experimentum ad Americanos provocandos factum esse. Eodem tempore cognoscere potuerunt, essetne illud missile satis bonae condicionis.

Copiae aeriae Britanniae et Francogalliae impetum communem in Syriam fecerunt, ut loca subterranea ab ordine Isis antea occupata delerent. Credebatur enim in illis spatiis arma et materia explosiva asservari.

Lusus nummarius apud pueros in Finnia valde increbruit, quod imprimis eos sollicitat, qui cum hominibus lusionibus addictis opus faciunt. In causa sunt commendatio mercium et rete, cuius ope ludus facilis factu est.

Zahran Mamdani, praefectus urbis Novi Eboraci (vulgo New York) nuperrime electus, ius iurandun muneris dedit. Caerimonia corano adhibito celebrata est, cum ille islamista esset. Qua re omnes oculis intentis spectabunt, quo modo magistratum gesturus sit.

Capulum submarinum inter Finniam et Estoniam intercedens gravia detrimenta cepit. Cum hoc animadversum esset, magistratus nostri navem onerariam in Sinu Finnico occupaverunt et quatuodecim nautas e diversis terris oriundos deprehendere.

Hoc est finis nuntiorum. Vobis gratias agimus et valedicimus.

---

NUNTII EPHEMERIDIS 07/05/2026
NUNTII EPHEMERIDIS 23/04/2026
NUNTII EPHEMERIDIS 16/04/2026
NUNTII EPHEMERIDIS 10/04/2026
NUNTII EPHEMERIDIS 17/03/2026
NUNTII FINNICI 19/01/2026
NUNTII FINNICI 01-01-2026
NUNTII FINNICI 28/12/2025
Nuntii Finnici 25/12/2025
Nuntii Finnici 24/12/2025