CHRONICA ALEXANDRAE RAMOS GADITANAE

Profestrix in Universitate Gaditana
Pagina academica

De Gaditano Regio Instituto Classico sideribus observandis deque eius auctore, cum puer erat.

   Ex maeniano meo domestico mare sinumque Gaditanum, novissimum pontem et aedicifium astronomicum spisso viridario consaeptum sub caelo versicolori cottidie prospicio. Hoc candidissimum aedificium, quod Regium Institutum Classicum sideribus observandis,  ROA vulgo litteris compendiariis nuncupatum, custodit, constructum est saeculo XVIII exeunte secundum delineationes Gasparis de Molina, III Marchionis de Ureña, clarissimi viri Gaditani.

   In quodam libro anno 1754 in lucem prolato nonnulla carmina forte inveni a Gaspare de Molina puero tredecim annos nato (rem miram!) conscripta. Quorum unum carmen ad latinistam, helenistam, librorum custodem librorumque optimum auctorem et clarissimum poetam Hispanum Ioannem Yriarte (1702-1771) dedicatum est, quod nunc infra vobis esxcribo:

“AD D. JOANNEM YRIARTE elegantissima carmina pangentem”         Qui te, Yriarte, audit Latio sermone loquentem,              Tempora Virgilii iam rediisse putet.         Et numeris miranda refers, miranda soluto               Ore, tibi musa est nescia parva loqui.         Denique tam solers tua pingit lingua figuras,                 Pictor ut et sculptor rarus habendus eris.

     In fronte libri eius, qui Gasparis de Molina carmina continet, imago adposita inspicitur, quae ad Regiam Academiam Artium Nobilium Matritensem rege Ferdinando VI anno 1752 inauguratam pertinet atque saeculo XVIII adhibita est.

   Supra basim triangularem, ut videtis, apparent insignia trium Artium laureā coronā circumdata. In solo conspicitur columna graeca sive romana truncata, malleus, scalprum et paleta cum penicillis. Supra haec omnia taenia est, in qua scriptum legitur lemma: TERNA ARMA MOVENDA, trina verba quae in Aeneidos libro octavo (v. 565) leguntur atque in hoc libro ad tres artes liberales sive nobiles referuntur, videlicet ad picturam, sculpturam et architecturam. 

   Decursu temporum hic puer tredecim annos natus multa pinxit, varia scripsit, res permiras arte facta invenit et haud pauca aedificia construxit tandem in oppidulo meo, quod Insula Legionensis (a familia Pontii Legionensis sic appellata) sive vulgo ‘San Fernando’ (nomen a rege Hispano nefando Ferdinando VI mutatum) appellatur. De hoc adulescenti poeta, qui posthac architectus, ingeniarius, artis musicae peritus, pictor et viator eruditus fuit, mox plura me scripturam esse spero.

Scripsit Alexandra Ramos Gaditana

---