ARS VIVENDI

   INTRITA GALLURENSIS

       Obsonium proprium Sardiniae

 

Magnitudines ad sex capita aptae:

panis sicci, kilogramma unum  

casei sine sale, semikilogramma

casei “parmigiano” vocatur, grammata ducenta

copiosum petroselinum

lardi grammata quinquaginta

iuris carnis elixae, litrae duae

  

Ius carnis elixae cum cepis, carotis, apio ocimoque parato. Interea panem (qui omnino siccus debet esse) quam subtilissimis segmentis secato; caseum (qui, contra, siccatus non esse oportet, sed recens, nuper confectus, italice “primo sale” vocatur) quam subtilissimis segmentis quoque secato.

In poculo quodam, contritum caseum “parmigiano” italice vocatum et per orbem totum terrarum bene cognitum, una cum petroselino minute conciso ponito, cochleari permisceto.

In olla fictili, plusminusve quattuor digitos pollicis alta, totum lardum subtilissimis segmentis secatum ponito, deinde tunc sufficienti  pane obruito totum, caseo “parmigiano” petroselinoque permixtis sternito, deinde postremo sufficienti caseo sine sale obruito totum.

Panem caseosque alium super alium eodem modo ponito ad res terminandas, denique “parmigiano” caseum sternito.

  

Furnum ad centesimum octogesimum Celsii gradum calefacito. Ollam iure carnis elixae gradatim hoc modo aspergeto: haud multum iuris, deinde aliquot minutas expectato ut ius strues sorbeat, iterum ac tertium haud multum iuris aspergeto. Cum fuscinula in strue facile usque ad fundum ollae mergitur, tum vero ollam in furno ponito.

 Per quadragintas quinque minutas plusminusve coquito dum in summa parte castanea crusta intrita apparet. Nunc demum ad mensam ministrato.

 

 

Scripsit Iulius Sansonetti

---

Puls Punica a Catone
Epistula ad animas extra tempus
De luso novo electronico in lingua latina
DE POPINARIIS HESPERIIS HAC TEMPESTATE IN ORIENTE POSITIS
LAGANUM HORATII POETAE
SECUNDA MENSA