Veneris die 4 mensis Septembris 2026

ARCHAEOLOGIA

AEDIFICIUM ROMANUM IN CAELIO NUPER REPERTUM

Octo conclavia pavimentis tessellis ornatis picturisque decorata in Villa Caelimontana detecta sunt

ROMA — In Villa Caelimontana, horto publico in Caelio sito, archaeologi octo conclavia aedificii Romani nuper detexerunt. Quinque omnino effossa sunt; tria alia ex parte tantum servantur. Aedificium saeculo secundo post Christum natum exstructum, tertio autem saeculo refectum atque aliter divisum est.

Aedificium casu patefactum est inter opera quibus vetus murus, quo clivus horti sustinetur, firmabatur. Cum archaeologi locum explorarent, compererunt murum, qui unus esse videbatur, ex duobus inter se contiguis constare. Terra deinde a tergo interioris muri remota, structurae Romanae apparuerunt.

Super has Romanas structuras saeculo septimo decimo porticus posita erat; eius quoque fundamenta reperta sunt, muris antiquis infra iacentibus firmiter innixa.

Inter ea quae maxime eminent magnum est pavimentum tessellis ornatum, cuius in medio emblema marinum conspicitur: crater, quem delphinus, piscis, locusta et cancer circumdant. Reperta sunt etiam fragmenta antiquioris pavimenti, quod ad Antoninorum aetatem pertinet, magnae partes picturae qua tectum ornabatur, multaeque crustae marmoreae varie sectae.

Ex copia atque elegantia ornamentorum archaeologi coniciunt fieri posse ut aedificium domus privata alicuius locupletis fuerit. Alia tamen indicia ad cohortem quintam vigilum spectare videntur. Inscriptiones enim aliaque monumenta antea reperta testantur cohortem quintam vigilum in hac Caelii parte stationem habuisse. Quaeritur igitur num aedificium nuper detectum ad castra eius cohortis pertinuerit.

Vigiles Romae incendiis coercendis et urbi noctu custodiendae operam dabant. Si aedificium ad cohortem quintam pertinuisse comprobabitur, castra eius latius patuisse quam adhuc putabatur apparebit.

De re tamen nondum constat. Simona Morretta, quae investigationi archaeologicae praeest, monuit rem nondum diiudicari posse, antequam structurae, res effossae atque universa loci ratio diligentius examinentur. Qui effossionibus praesunt neutram sententiam adhuc pro certa habent.

Totum aedificium effodi non potuit. Reliquiae longius versus interiorem hortum pergunt; quominus autem latius effoderentur, et magnae cupressi et pecuniae operi destinatae modus obstiterunt. Nunc structurae et res inventae diligenter describuntur atque examinantur.

Ex investigationibus quae nunc fiunt apparebit utrum aedificium domus privata fuerit an ad cohortem quintam vigilum pertinuerit. Interim constat sub horto hodierno partem aedificii Romani saeculi secundi, tertio saeculo mutati, adhuc servari.

Scripsit Beniaminus Martinus

DE MONUMENTIS ROMANORUM IN ILLYRICO EPIROQUE (I)
Castra Romana in Slovacia Nuper Reperta
De Nova Investigatione Archaeologica in Catalonia
De Inventione Societatis Matrilineae apud Çatalhöyük
TE K'AB CHAAK ET SPLENDOR IADEI
Novae effossiones Emporitanae
VIRIDIA ANTIQUA POMPEIIS RENATA SUNT
DONUM BACCHI ANTIQUISSIMUM
LITUS HERCULANEI OMNIBUS PATET
THESAURUS MILIUM XXX NUMMORUM IN SARDINIAE MARI REPERTUM EST