 |  |  |
| Solis die 8 mensis Septembris 2024 | ||
ACROAMATA & ALIA BLOGA LATINA
Hic praebentur acroamata (vulgo: podcasts) et bloga varia quae in rete inveniri possunt. Certe opiniones hic expressae externae sunt Ephemeridi.
FRANCISCUS LEPORE
Nuntii Latini
Novus Galliae administer princeps
05 Sep 2024, 23h00
Cui nomen Michael Barnier
Hesterno die Michael Barnier, Factionis Republicanae sodalis quondamque Commissarius Europaeus, ab Emnanuele Macron, Gallorum nationis moderatore, Supremi publicae rei gubernandae Consilii praeses nominatus est anno aetatis suae tertio et septuagesimo. Quo in munere is, rerum conservandarum ordinisque publici studiosus, Gabrieli Attal, sextum et tricesimum agenti annum, successit.
Helena Schlein disertum de suis rebus gestis librum typis excudendum curavit
04 Sep 2024, 23h00
Hoc opus, quod suprema Factionis Democraticae moderatrix cum Susanna Turco composuit, vulgata lingua "L'imprevista. Un'altra visione del futuro" inscribitur
Hesterno die Helena Schlein, quae Anglico nomine Elly nuncupatur, in Instagrammate breviorem pelliculam visificam divulgavit, per quam nuntiavit se librum, in quo suam ipsa vitam enarret, una cum Susanna Turco, egregia diurnaria, scripsisse eundemque perspicuis domus editoriae Feltrinellianae typis exarandum curavisse. Quod opus, cui vulgo titulus L’imprevista. Un’altra visione del futuro (Latine “Inexspectata. Alia rerum futurarum visio”), ex die Martis, decimo huiusce mensis Seprembris, apud tabernas librarias undeviginti euronummorum pretio venibit.
Nadia Terranova victrix e Certamine Calviniano discedit
02 Sep 2024, 23h00
Quamobrem clarissima fabularum scriptrix ex publica pecunia in insula Islandia, quam aliqui Thulen vocant, unum per mensem commorabitur
A. d. III Kal. Sept. nuntiatum est Nadiam Terranova quoque, cum iam Supremum Consilium exteris Reipublice Italicae negotiis praepositum praemio, quod Italice Residenze Calvino dicitur, Genevam Latini et Almam Velletri honestavisset, victricem ex litterarum certamine discedisse eandemque palmam tulisse. Quamobrem clarissima fabularum scriptrix, patriae suae Messanensis decus totiusque Italiae lumen, sumptu publico Reykiaviki, in urbe Islandiae capite, apud litteris provehendis aedes, quas vulgo Gröndalshús vocant, a crastino die, quarto huiusce mensis Septembris, usque a. d. IV Non. Oct. commorabitur.
Michael Guérard mortuus est
20 Aug 2024, 23h00
Archimagirus Gallicus omnibus laudibus celebratus nudius tertius obiit
Die Lunae, undevicesimo mensis Augusti, Michael Guérard domi suae in Novae Aquitaniae oppidulo, quod vulgo Eugénie-les-Bains nuncupatur, exstinctus est annum agens alterum et nonagesimum. Complures summo maerore affecti sunt, quum comperere celeberrimum archimagirum inventoremque culinariae artis, quam Gallico sermone nouvelle cuisine dicunt, animam efflavisse. Ex quibus Alanus Ducasse, summi nominis coquus, per nuntiolum in Instagrammate scriptum dolorem suum patefecit atque Michaelis laudes ad astra sustulit.
Shepard Fairey suffragatur Kamalae
16 Aug 2024, 23h00
Magni nominis artifex celebrem Foederatarum Americae Civitatum praesidis muneris candidatam democratarumque sodalem splendidis reddidit coloribus
Die Iovis Franciscus Shepard Fairey, qui nomen commenticium OBEY sibi adiecit, omnes per interretialem nuntium certiores fecit sese Kamalam Harris sequi. Ad quam roborandam sententiam artifex ille miram Factionis Democraticae sectatricis atque Foederatarum Americae Civitatum praesidis muneris candidatae effigiem eandemque similem Baraci Obama imagini, quam anno MMVIII splendidis descripserat coloribus, delineavit ac pinxit.
____________________________________
|
|
|
|
