Ingentissima labes lutulenta cum aqua et fragmentis mixta territorium inter finem Nepalianum et Tibetanum obruit. Calamitatis causa videtur esse ruina molium glaciei. Complures centenae incolarum irreperti sunt. Civitates Americae Unitae quingenta milia dollariorum pro auxilio erogaverunt. *** *** De bello inter Ucrainam et Russiam civitates Europae “sedulae” exercitationes coniunctas proponunt, sed Italia dissidet nec milites missura est. Russia minatur Regno Unito quod concedit ut fiant nova missilia Scalp, quae infra moventur velut parva velivola sine rectore ex longinqua directa. *** *** Vehementissimus terrae motus maginitudinis septem cum quattuor decimis duas regiones Columbiae vastavit; complura aedificia corruerunt et mille victimae saltem provisae sunt. Effoditur inter ruinas ut superstites inveniantur. Quassus etiam in finitimis nationibus perceptus est. *** *** Praeses Donaldus Trump nuntiavit Civitates Unitas rursus custodias maritimas in freto Hormusiano posituras esse. Omnes naves rei publicae Islamicae ex suis portubus exire vel inire in eosdem vetabuntur; immo solvendum erit navibus transeuntibus portorium viginti partium ex centum pretii mercis vectae. Nec hoc satis est: indutiae prorsus intermittuntur, cum petitio in sedem occultam nuclearem subterraneam Iraniae apparetur. *** *** Hesterno die lusor Italicus Iohannes Sinner rursus discessit victor certaminis teniludi Wimbledoniani et iure meritoque existimatus est primus inter ceteros hoc ludicrum in toto orbe exercentes. *** *** Hesterno die Pontifex Leo XIV praebuit primam encycliclicam c.t.e. “Magnifica Humanitas” de custodia hominum tempore Intelligentiae Artificialis quo necesse est novam aetatem humanam creare, cum orbis vexatur bellis et inaequalitate. Timor est ne commutatio digitalis dominium potentiorum et inopiam gentium augeat pro iure et fraternitate.